جامبىلدىقتار ەڭبەك رەسۋرستارىن باسقارۋدى جولعا جۇيەلى قويۋ سول ارقىلى ەل ەكونوميكاسىن ىلگەرىلەتۋ ماقساتىندا قابىلدانعان «جۇمىسپەن قامتۋدىڭ جول كارتاسى-2020» باعدارلاماسىن ءتيىمدى پايدالانۋدا. باعدارلاما قابىلدانعان ەكى جىل ىشىندە 1304 مۇشەسى بار 362 وتباسى سولتۇستىك وڭىرلەرگە كوشكەن دەپ جازادى Qamshy.kz اقپارات اگەنتتىگى. 

جالپى ەلىمىزدە «جۇمىسپەن قامتۋدىڭ جول كارتاسى – 2020» باعدارلاماسى ىسكە قوسىلعاننان بەرگى ارالىقتا وڭتۇستىك وڭىردەن 19 مىڭ ادام سولتۇستىك وڭىرگە قونىس اۋدارعان ەكەن. 2020 جىلعا قاراي قونىس اۋدارۋشىلار سانى 3،5 ەسەگە دەيىن ۇلعايماق.

–وڭتۇستىكتەن سولتۇستىك وڭىرلەرگە قونىس اۋدارۋشىلارعا ارنايى ماماندىعىنىڭ بولۋى مىندەتتەلەد. ەگەر وتباسىمەن قونىس اۋدارۋعا نيەتتىلەر بولسا وتباسى مۇشەلەرىنىڭ ءبىرىنىڭ ماماندىعى بولعانى قۇپتالادى. ماماندارعا سۇرانىس سولتۇستىك وڭىرلەردەن تۇسەدى. ءبىز ازاماتتاردى سول سۇرانىسقا ساي كوشىرەمىز. اعىمداعى جىلدىڭ 7 ايىندا 352 ادامنان تۇراتىن 110 وتباسى سولتۇستىك وڭىرلەرگە قونىس اۋداردى. جىل سوڭىنا دەيىن 706 مۇشەسى بار 176 وتباسىنى تەرىسكەيدىڭ ەڭبەك رەسۋرستارى تاپشى وڭىرلەرىنە كوشىرۋ جوسپارلانىپ وتىر. وتكەن جىلى 198 وتباسى وسى باعدارلاما قاتىسۋشىسى اتاندى،–دەيدى جامبىل وبلىسى اكىمدىگىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى كوشى-قون ءبولىمىنىڭ باس مامانى اسەل سۇلتانعازييەۆا.

ىشكى كوشى قون سالاسىنداعى ىلكىمدى باعدارلاما ارقىلى سولتۇستىك قازاقستان وبلىسىنا قونىس اۋدارىپ، ماماندىعىمەن جۇمىسقا ورنالاسقان جامبىلدىقتىڭ ءبىرى – ايدا قىدىربەكوۆا.ءقازىر ول سولتۇستىك قازاقستان وبلىسىنداعى اققايىڭ اۋدانىنىڭ پولتوۆكا اۋىلىنداعى فەلدشەرلىك-اكۋشەرلىك پۋنكتىندە مەدبيكە بولىپ قىزمەت ەتەدى.

–ءبىز مۇندا جامبىل وبلىسىنداعى بايزاق اۋدانىنىڭ جەتىباي اۋىلىنان اعىمداعى جىلدىڭ مامىر ايىندا عانا كوشىپ كەلدىك. ءوزىم 2016 جىلى جامبىل مەديسينالىق كوللەدجىن ءتامامدادىم. كوپ ۋاقىت جۇمىسسىز جۇرگەنىمدە وڭتۇستىكتەن سولتۇستىككە قونىس اۋدارۋ باعدارلاماسى جايىندا ەستىپ، قاجەتتى قۇجاتتارىمدى جينادىم. ءقازىر اققايىڭ اۋدانىنىڭ پولتوۆكا اۋىلىندا تۇرىپ جاتىرمىن. مۇندا ءبىز سەكىلدى وڭتۇستىكتەن كوشىپ كەلگەن وتباسىلار دا بار،– دەيدى ايدا قىدىربەك قىزى.

ايتا كەتۋ تۇستىكتەن تەرىسكەيگە بەت العان كوشكە ەرگەن جامبىلدىقتاردىڭ دەنى سولتۇستىك قازاقستان وبلىسىنا تابان تىرەيدى. اتالعان ءوڭىردىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى الماز قوشمانوۆتىڭ مالىمدەۋىنشە جامبىل وبلىسىنان سولتۇستىك قازاقستان وبلىسىنا 580 ادام كوشىپ بارعان ەكەن. ولار ءقازىر اۋىل شارۋاشىلىعى، دەنساۋلىق ساقتاۋ، پەداگوگيكا سالالارىندا جەمىستى ەڭبەك ەتىپ جاتىر.